Si nisi Fitstation

“Gratë shpesh janë motori i gjithçkaje, por harrojnë të kujdesen për veten. Shëndeti nuk është luks – është themeli i gjithçkaje.”

Fitstation nuk lindi nga një ide biznesi. Lindi nga një ndjesi e thellë – një boshllëk që shumë gra e njohin, por rrallë flasin për të.

Isha 25 vjeç, nënë për herë të parë. Me një trup që nuk e njihja më dhe emocione që nuk mund t’i ndaja me askënd. Të gjithë më thoshin “Je mirë”, “Je me fat”, “Çfarë do më shumë?” – por brenda vetes ndihesha bosh. Nuk isha më unë.

Për muaj të tërë heshta. Derisa një ditë vendosa të flas. Pa filtra. Pa maska. Thjesht e vërteta ime. Dhe ndodhi diçka e papritur – shumë gra më shkruan. U ndjenë të përfshira. E ndjenin njësoj. Kështu nisi Fitstation – si një blog.

Fjalët u bënë frymëmarrje. Blogu u kthye në program televiziv. Por sa më shumë flisja për të ndihmuar të tjerat, aq më shumë kuptoja se po e harroja veten.

Një kthesë e re, një thirrje për kujdes ndaj vetes

Tani, 35 vjeç. Nënë për herë të dytë. E lodhur. Me një trup që nuk përgjigjej si më parë. Me mjegull, dhimbje dhe mungesë energjie. Asgjë që kisha mësuar nuk funksiononte më.

Dhe atëherë erdhi emri: Hashimoto. Jo një fund. Por një kthesë.

“Sëmundja nuk është dobësi. Është një ftesë për të dëgjuar më shumë trupin, më pak botën.” – Gabor Maté

Hashimoto më ndaloi. Më mësoi të dëgjoj trupin, emocionet, historinë time – jo për t’u frikësuar, por për të ndërtuar një marrëdhënie të re me veten.

Sot, Fitstation nuk është thjesht një faqe. Është një hapësirë ku gratë ndihen në qendër të historisë së tyre.
Për ato që janë të lodhura nga këshillat e zbrazëta. Që nuk kërkojnë perfeksion, por kuptim. Që janë gati të ndalen, të dëgjojnë trupin dhe të fillojnë sërish – me butësi dhe vetëdije.

Një ftesë për ty...

Nëse je ndier ndonjëherë e lodhur, e padukshme, ose thjesht jashtë vetes,  nuk je vetëm. Kam shkruar për ty. Fjalë që nuk japin zgjidhje të shpejta, por prekin thellë. Sepse ndonjëherë, të lexosh ndjesinë e dikujt tjetër është hapi i parë drejt vetes.
Lexo më shumë